Məsələni Siyasiləşdirməyin!

Azərbaycanda qarşıdan prezident seçkiləri gəlir. Bəzi elementlər, ünsürlər indidən bu hadisəni siyasiləşdirməyə başlayıblar. Azərbaycanın sürətli inkişafını gözü götürməyən bu dairələr hətta, parlamenti belə siyasiləşdirməyə cəhd edirlər. Ayıb olsun!

Qalibiyyət üzüntüsü

Bir idmançı üçün qazandığı qələbədə əməyinin kölgələnməsi çox ağrılı bir şey olmalıdır. Mənim kimi tamaşaçı üçün isə idman yarışlarında şərhçinin "qazanılmış siyasi və iqtisadi uğurlardan, inşa edilmiş idman obyektlərindən və körpülərdən, uğurlu daxili və xarici siyasətdən" danışması qədər qıcıqlandırıcı az şey olur. Məsələn, voleybolçu qızlarımızın bir ara uğurlu çıxışları ərəfəsində ölkə prezidentinə edilən mədhiyyələrin foununda həmin yarışları izləmək həm gülməli, həm də acınacaqlı idi. İdmançının öz əməyi ilə əldə etdiyi qalibiyyət və ölkəsinin bayrağını yüksəklərə qaldırmasını uğurlu ümummilli siyasətin, tikilən körpülərin nəticəsi kimi təbliğ edəndə təxminən yuxarıdakı görüntü yaranır məncə.